TimorNewsNetwork

Rumoris Potensial Hamosu Pániku no Instabilidade

Source: Fundasaun Mahein

Publika iha Abril 13, 2012 ho 

Komunidade nia uma hetan sunu iha suku Alimbata-BabuloWatulari, hafoin eleisaun jeral 2007. (Arkivu FM).

Observasaun Fundasaun Mahein (FM) nian ba situasaun Timor-Leste relasiona eleisaun segundu voltaeleisaun Prezidenti Repúblika periodu 2012-2017 nota katak komunidade komesa paniku ho boatus ka rumoris ne’ebé espalla iha teritoriu Timor-Leste. Boatus no rumoris sira ne’e nudar sasidik ida mai husi linguazen lider polítiku sira ne’ebé la iha sasukat atu hato’o ba povu, iha sira nian kampañia eleitoral.Linguazen lider polítiku sira hamosu tensaun polítika iha nivel baze ne’ebé mosu asaun violentu balu.

Alem de linguazen husi lider polítiku sira, mosu mos linguazen husi Ekipa Susesu Kandidatu Prezidenti Repúblika sira ne’ebé iha tendensia makáas hatauk komunidade sira. FM nota durante kampañia eleitoral segundu volta Ekipa Susesu Prezidenti Repúblika halo deklarasaun polítika atraves media ho linguazen ne’ebé kroat hodi ataka malu. Linguazen hirak ne’e forma opiniaun públika iha komunidade nian leet, espalla rumoris husi ibun ba ibun no komunidade balu pániku ba rumoris hirak ne’e. Intervista ida iha Radio Televizaun Timor-Leste (RTTL) ho Maijor Jeneral Lere Anan Timur iha loron 12 Abril 2012, hatete katak nian simu informasaun balu katak komunidade balu aruma no prepara sira nian sasan tanba tauk ho rumoris ne’ebé espalla iha sira nian leet.

Maibe to’o agora seidauk iha instituisaun estadu nian ruma atu informa bebeik situasaun rai laran ba públiku, liu-liu komunidade sira ne’ebé afetadu husi rumoris hirak ne’e. Iha ámbitu responsabilidade siguransa interna nian, PNTL tenki informa bebeik situasaun rai laran ba públiku atu hamate rumoris ka boatus hirak ne’e. FM deskontenti wainhira RTTL konvida Komadante Jeral PNTL Longuinhos Monteiro atu tuir debate iha studiu RTTL, iha loron 12 Abril 2012 konabá situasaun rai laran iha kampañia segundu volta maibé Komadante Jeral PNTL la marka prezensa hodi informa situasaun rai laran ba públiku. Responsabilidade hanesan Parlamentu Nasional, Komisaun B ne’ebé halo fiskalizasaun ba asuntu defeza no siguransa to’o agora seidauk iha lian ba asuntu defeza no siguransa, relasiona ho rumoris ka boatus ne’ebé espalla iha teritoriu Timor-Leste.

Tensaun polítika iha nivel baze iha ona rezultadu negativu ba komunidade, akontese insidenti ki’ik sira iha distritu hanesan iha distritu Baucau, Viqueque no Ermera. FM sita ba Maijor Jeneral Lere Anan Timur nian liafuan ne’ebé kolia konabá akontesementu balu iha periodu kampañia segundu volta eleisaun prezidenti repúblika, akontese iha distritu Baucau, sub-distritu Quelecai, sunu uma lima iha loron 11 Abril 2012 (RTTL 12/04/2012). Akontesimentu hanesan iha distritu Viqueque, sub-distritu Uatolari iha insidenti ki’ik ida ne’ebé tuda rahun komunidade nian uma hamutuk haat no sede aldeia nian ida iha Aliambata. Nune’e mos, iha distritu Ermera apoiante Kandidatu Prezidenti Repúblika balu hetan tuda husi grupu deskuinesidu hafoin fila husi kampañia, iha loron 9 Abril 2012.

Tanba ne’e FM rekomenda ba instituisaun estadu nian ne’ebé responsabiliza seguransa interna no orgaun estadu ne’ebé halo fiskalizasaun ba asuntu defeza no seguransa, informa bebeik informasaun kredivel konabá situasaun rai laran ba públiku hodi hamate rumoris ne’ebé oras ne’e dadauk espalla iha komunidade nian leet. Hanesan Komisaun B Parlamentu Nasional ne’ebé fiskaliza ba asuntu defeza no siguransa presiza halo avaliasaun ba relatoriu sira konabá situasaun rai laran ho Sekretaria Estadu Siguransa (SES). Operasionalmente Komandu Jeral PNTL presiza identifika risku violensia no amesa sira iha rai laran, liu-liu rumoris sira ne’ebé oras ne’e dadauk espalla iha teritoriu Timor-Leste, Komandu Jeral PNTL presiza komunika nafatin ba komunidade sira atu nune’e komunidade bele hetan informasun ne’ebé los no kredivel.