TimorNewsNetwork

Fos ho marka MTCI fa’an iha Kalimantan-Indonezia, MTCI seidauk simu keixa husi Indonezia

Sábadu, 27 Agustu 2011 23:44Hakerek nain: Belina da Costa, TDW

Ministro Gil Alves hateten seidauk hetan keixa hosi Governu Indoensia kona ba fox marka MTCI fan iha Kalimantan.

Kazu fos ho marka governu nian MTCI ne’ebe fa’an iha Kalimantan-Indonezia, Ministeriu Turismu Komersiu e Industria (MTCI) seidauk bele fo komentariu ruma sein iha keixa ruma husi governu Indonezia.

Tuir Ministru Turismu Komersiu e Industria, Gil Alves, katak governu seidauk bele foti medidas ruma tanba laiha reasaun ruma husi governu Indonezia, tanba ne’e nudar estadu ho estadu.
“Ami labele halo uluk reaksi kuandu laiha informasaun formal ruma husi governu Indonezia liu husi kanais diplomatiku e ami la sente hakfodak ho notisia ne’ebe fo sai iha media Indonezia kona-ba kestaun ne’e tanba Timor-leste la’os ona provinsia husi Indonezia,”hateten Ministru Gil Alves, semana kotuk iha Mandarin,Dili.

Gil informa, tuir lei produtu importasaun ne’ebe importa mai TL, selu bainhira hatun iha Portu Dili no antes tama iha armajen governu nian. “Maibe karik sasan sei iha ema nia ro laran mesmu ke uza atributu nasaun, ne’e konsidera illegal no presiza halo investigasaun,”nia dehan.

Maibe tuir ministru, mesmu iha informasaun formal husi Indonezia kona-ba fos ne’e, nia parte sei estuda no halo analiza klean,no karik sei halo investigasaun ka halo protesta bazea ba faktus, tanba ate agora miniteriu seidauk hatene lolos kestaun ne’e.

Tuir dadus konkretus husi parte Segurança Alimentar Economia (IAE) kona-ba fos MTCI nebé importa ho kuantidade 30.000 toneladas liu husi kontratus ne’ebé estabelese ho kompanias 68, deskarregamentu ikus liu ba fos hamutuk tonelada 1.100 iha armazen ne’ebe tula ho ro ahi Kargu LON VAN,hahú 09 to’o 12 Maio fulan kotuk.

“Ami nia instutisaun prontu atu hatan ba duvidas ne’ebe comunidade sira no membro parlamento kestiona kona-ba fos ne’ebe faan iha nasaun Indonesia maibe informasaun nee tenki bazeia ba faktus,karik los ami prontu atu halo investigasaun,” Ministru Gil katak.

Entretantu Xefe Gabinete Juridiko IAE,Salsino Martins Corbafo hateten,informasaun ne’e seidauk bele dehan los tanba iha lei numeru 23 kona-ba pelanggaran e iha artigu balun koalia kona-ba falsifikasaun karon /sakas, marka, presu no esportasaun ne’ebe illegal.

“Se akontese duni ne’e criminal, ezemplu sidadaun ne’ebe mak halo penyelundupan sasan sira iha ne’e lori ba rai liur sein iha konesementu no laiha autorizasaun husi governu,ne’e kontra lei inflasaun kode penal krimi kontra ekonomia,”nia dehan.

“Maibe informasaun ida ne’e ami seidauk lahatene tanba ami lahetan informasaun klaru husi nasaun Indonezia.”



Source: http://thediliweekly.com/tl/pagina-dahuluk/dezenvolvimentu/148