TimorNewsNetwork

Prémiu Ekuatoriál Loke Nomeasaun Mundiál ba Nomeasaun Prémiu Dezenvolvimentu Sustentável

Novaiorke — Parseria ida-ne’ebé lidera hosi PNUD ne’ebé rekompensa ba komunidade sira iha mundu tomak tanba sira-nia konservasaun no solusaun dezenvolvimentu nian hala’o tiha lansamentu ida ba nomeasaun ba Prémiu Ekuatoriál  tinan 2012, ne’ebé sei aprezenta iha on-line iha www.equatorinitiative.org.

Tuir karta komunikadu ba imprensa ne’ebe Media UNDP iha Timor Leste haruka ba Redasaun Timor Expose via internet haktuir, inisiativa Prémiu Ekuatoriál ne’e sei fó ninia prémiu tinan rua-rua nian ba solusaun lokál kona-ba dezenvolvimentu sustentável iha Konferénsia ONU nian tinan oinmai kona-ba Dezenvolvimentu Sustentável (Rio+20). Nomeasaun sira loke hosi  nasaun 145 to’o iha loron 31 fulan-Outubru, tinan 2011. Elejibilidade ba prémiu ne’e haluan tiha ona hodi inklui nasaun hotu-hotu ne’ebé  simu  apoiu hosi PNUD, ne’ebé halo buat ne’e sai nu’udar prémiu ida mak globál duni ba  prátika lokál ne’ebé di’ak liu.

“Ami espera ezemplu balun ne’ebé sinseramente inspiradora ba solusaun dezenvolvimentu nian ne’ebé bazeia iha komunidade, ne’ebé funsiona ba povu no meiu-ambiente,“ Veerle Vandeweerd, Diretora ba Grupu Enerjia no Meiu-ambiente Programa Nasoins Unidas nian ba Dezenvolvimentu (PNUD) hateten.

“Bee no asesu ba enerjia, seguransa ai-han, no adaptasaun ba mudansa klimátika nu’udar dezafiu dezenvolvimentu nian iha ita-nia tempu,” nia hateten, hodi nota katak prémiu temátika foun sira iha área hirak-ne’e sei reflete énfaze tinan 2012 nian ba “komunidade sira ne’ebé reziliente ba dezenvolvimentu sustentável”.

Premiadu-sira pasadu nian mak organizasaun nivel baze sira ne’ebé foti asaun atu hadi’a  moris-di’ak populasaun lokál nian no meius-de-subsisténsia, embora fó protesaun ba meiu-ambiente liuhosi, porezemplu; jestaun florestál komunitária, peska ho eskala ki’ik, protesaun ba animál fuik, banku ba fini nian, enerjia sustentável no asesu ba bee-moos.

Prémiu Ekuatoriál – ne’ebé apoia hosi eis xefe estadu, Gro Harlem Brundtland (Noruega) no Oscar Arias (Kostarrika), filantropu, Ted Turner, laureadu Prémiu Nobel sira lubuk ida, no artista sira hanesan Gisele Bündchen no Edward Norton– sei selebra nia aniversáriu ba da-10 nian iha tinan oinmai.

Resipiente na’in-25 sira ne’e hotu ba tinan oin nia prémiu sei simu prémiu osan US$5,000, ho ema na’in-10 ne’ebé hili tiha ona ba “rekoñesimentu espesiál” ho total osan US $20,000 ba ema ida-idak.

Reprezentante komunidade manan-na’in sira sei partisipa iha enkontru komunidade nian ida hamutuk ho eventu  Rio+ 20 nian, ne’ebé sira sei hetan selebrasaun iha palku internasionál ida, ne’ebé iha ligasaun ho formuladór polítika sira no rekoñesidu hanesan líder iha sira-nia área.

Inisiativa Ekuatoriál ne’e nu’udar parseria ida-ne’ebé halibur hamutuk  ONU, Governu, sosiedade sivíl, negosiante sira, no organizasaun nivel baze sira, hodi avansa ho solusaun lokál ba povu, meiu-ambiente, komunidade sira ne’ebé reziliente iha mundu ida-ne’ebé iha mudansa.

Parseiru atuál ba inisiativa ne’e inklui; Konservasaun Internasionál, Konvensaun kona-ba Diversidade Biolójika, Parseiru sira Eko-agrikultura nian, Universidade Fordham; Ministériu Federál Alemaña ba Kooperasaun no Dezenvolvimentu Ekonómiku, Uniaun Internasionál ba Konservasaun Natureza, The Nature Conservancy, Ministériu Negósiu Estranjeiru Noruega nian, Ajénsia Kooperasaun ba Dezenvolvimentu Internasionál Suesia nian (SIDA), Programa Meiu-ambiente ONU nian, PNUD, no Fundasaun ONU.

Source: http://timorexpose.com/?p=3585