Komunidades iha Hera no Fatu-Ahi preokupa ho kondisaun estrada aat
Komunidade Hera no Fatu-Ahi preokupa tebes ho kondisaun estrada iha parte rua ne’e tanba sei aat hela.
Tuir Secretario Estado (SE) Obras Publicas, Domingos dos Santos Caero, iha tinan liu-ba wainhira tempu udan estrada Hera ho kondisaun aat tebes, nune’e iha momentu ne’eba sira haruka projetu emerjensia ida hodi ba aterru rai.
“Hauhanoin iha Hera, tinan ne’e ami hahu halo ona kontinusaun husi projeatu ne’ebe tinan liu-ba hala’o ne’ebe halo husi kruzamentu liu husi tasi ibun nian”, dehan SE Caero.
Hosi parte Fatu-Ahi kondisaun estrada mos aat tebes no relasiona ho ida ne’e SE Caerio hateten katak maske planus iha wainhira foin dadauk nia ekipa analiza kondisaun jeolojika iha fatin ne’e, determina katak risku tebtebes.
“Kondisaun tekniku jeolojiku iha ne’eba risku tebtebes maibe sekarik ita halo protesaun husi foho leten bele proteje tamba estudu ne’e ami halo kompletu ona. Nune’e Ministerio iha osan hodi halo study case, agora iha ona prosesu nia laran atu halo tederizasaun ba kompania hodi la’o tuir estudu tekniku husi obras publika no expert husi JICA ne’ebe suporta ami,” katak SE Caero.
Entretanto Prezidente Komisaun G, Parlamento Nasional, Pedro da Costa hateten Orsamentu Jeral aloka ona fundus ne’ebe to’o atu halao reabilitasaun ne’e.
“Orsamentu jeral ne’ebe aloka ba infrastrutura hamutuk $405.924 milloes. Iha Ministerio Infrastutura nia okos hamutuk $88.618 milloes no aloka deit ba distritu Dili hamutuk $6.044 milloes,” hateten Deputadu Pedro da Costa.
Oras ne’e daudauk reparasaun ba estrada Hera liu hosi tasi ibun hahu ona hadia no kompanhia Montana Diak mak kaer projetu ne’e.
Source: http://www.thediliweekly.com/tl/pagina-dahuluk/kapital/318
No comments:
Post a Comment