TimorNewsNetwork

Jornal INDEPENDENTE - Tersa, 06 Setembro 2011

Dili-Sekretariu Jeral Partidu FRETILIN, Mari Alkatiri hateten, Partidu FRETILIN apoiu muda lei fundu petroliu hodi investe, maibe kontra Politika Governu nian ne’ebe atu foti 10% fundu petroliu hodi garante atu halo divida.

“Muda lei para investe to’o 50%, hau hanoin 50% ne’e bot demais, hau dehan, ona ba irmaun Xanana ho Prezidente Horta, it abele hetan consensus ida 25% ou 30% ne’e para FRETILIN sei vota afavor, 50% ne’e demais,” dehan nia.

Maski lei ne’e, aprova ona katak, governu bele hasai 50% Fundu Petroliu atu investe, tanba lei ne’e FRETILIN mak sei aplika.

“Hau laran la taridu, tanba sira sei la iha tempu para atu halo buat ne’e, lei ne’e ami mak sei implementa, kuandu ami mak implementa ami mak sei kuidadu hodi evita gasta nar-naran deit,”tenik Mari.

Maibe Alkatiri dehan, nia kontra politika hodi hasai 10% Fundu Petroliu hodi garante deve.

“10% garante ba deve, ne’e bah au la loos, se ita atu ba banku buka osan atu halo projeitu ida, tanba ita iha kapasidade atu halo jestaun ba osan ne’e para atu selu fila fali osan ne’e ho funan,” hateten Sekjer FRETILIN.

Nia fo ezemplu, kuandu governu hakarak deve, maibe lori fali osan Fundu Petroliu mak atu garante ne’e hatudu katak, governu rasik laiha kapasidade atu halo jestaun.

“Ba foti fali osan mina rai para taka ne’e signifika katak, ita rasik laiha kapasidade atu halo jestaun, se ita laiha kapasidade atu jestaun ba buat ida ne’e, diak liu lalika deve,” dehan Alkatiri.

Alkatiri dehan, rai sira ne’ebe mak hakarak fo deve ba TL, tanba sira garante ba mina rai Timor Leste nian.

“Agora rai sira ne’ebe atu fo ne’e, sira mak hakarak garantia duni ba riku mina rai, ne’e ita labele, ita aban-bainrua ita lori osan mai ba para hotu iha estranjeiru, aban bain rua ita nia oan no ita nia be oan sei la iha osan, tamba osan restu mina rai ne’e sei selu fali divida ne’e,” tenik eis Primeiru Ministru ne’e.

.