TimorNewsNetwork

Press Release

Tomada de Posse Komisariu KAK
“Halakon Korupsaun Sei Sai Hanesan Mehi Deit”

Iha loron 22 de Febreiru de 2010, ofisialmente Parlamentu Nasional halao ona Tomada de Posse Sr. Aderito de J.Soares nudar Primeiru Komisariu ba Komisaun Anti-Korupsaun iha Republika Demokratika Timor Leste, nebe mak mos haktuir ona iha Lei Anti-Korupsaun Artigu 7.

Luta Hamutuk nudar instituisaun sosiedade sivil, hakarak hato’o mos parabens ba Sr. Aderito de J.Soares nebe demokratikamente nomeadu nudar Komisariu Komisaun Anti Korupsaun iha Timor Leste. Luta Hamutuk hakarak kongratula komisaun KAK nebe mak iha nia intervensaun hateten mos katak sei nakloke an ba entidade hotu inklui sosiedade sivil sira atu koopera hamutuk hodi halakon korupsaun.

Tuir Luta Hamutuk nia observasaun ba iha intervensaun Sr. Aderito de J.Soares iha Parlementu Nasional, nebe Komisariu ne’e hato’o lia-fuan sira nebe mak nakonu ho esperansa ba Timor oan sira atu monu dala ida tan ba politika governu hodi kombate korupsaun iha governu. Nudar Luta Hamutuk sei la fiar ba manovras politka ida ne’e Tamba istorikamente hatudu ona katak, governu AMP laiha kapasidade naton atu halakon korupsaun nebe mak lemo-lemo iha governasaun ida ne’e, tamba korupsaun nebe mak akontese ne’e impaktu husi sistema nebe mak fraku no mentalidade korupsaun nebe mak sei daet makas iha governante balun nia isin lolon.

Realidade hatudu ona mai ita katak antes atu hari’i governu ne’e mak hanaran IV Governu Konstitusional, Sr.Xanana Gusmao rasik halo promesa furak teb-tebes ba povu timor liu husi kampaña politika katak “ Se Mak Naok $5 cent, sai.....” maibe to ohin loron seidauk hasae ema ida husi governu maske osan mak lakon liu $5 cent. PDHJ nebe nudar institusaun independente nebe mak halao nia knar tinan barak ona, maibe to ohin loron, defaktu PDHJ mos seidauk prosesa ka hatama koruptor ida ba iha prizaun Becora. La kleur mosu fali politika reforma administrativa iha IV governu konstitusional nia laran, nebe hamosu II Vice Primeiru Ministru atu hare’e ba asuntu Administrasaun no Boa Governasaun, hodi nomea ona Sr. Mario Viegas Carascalão mak asume kargu ida ne’e. Realidade hatudu katak Sr. Mario V.Carascalão mos halo promesa oi-oin ba timor oan katak atu halakon korupsaun, ne’e mos la konsege. Agora dadaun mosu fali Komisaun Anti-korupsaun nebe mak sei lidera husi Sr. Aderito de Jesusu.

Husi Fenomea politika hirak nebe mak akontese iha tinan hirak nia laran, Luta Hamutuk fiar katak prezensa primeiru Komisariu Komisaun Anti Korupsaun nebe atu halakon korupsaun iha Timor Leste, sei sai hanesan mehi no mehi deit !!! Tamba ne’e Luta Hamutuk hakarak dezafia ka fo deadline ba Komisariu Anti Korupsaun katak iha intervalu tempu tinan 2 nia laran, karik KAK la konsege halakon korupsaun iha governasaun ida ne’e, Luta Hamutuk sei organiza manfestasaun publika ida hodi husu atu Komisariu ne’e resigna-an no desolve Komisaun Anti Korupsaun.

Relasiona ho lei anti korupsaun nebe mak promulga ona husi Presidente da Republika iha 7 de Julho de 2009 (Artigu 9; Incompatibilidades), Luta Hamutuk husu ba Sr. Aderito de Jesus nudar Komisariu Komisaun Anti Korupsaun atu iha tempu badak nia laran, ofisialmente hato’o ka deklara nia Karta Rejignasaun husi organizasaun politika “Fretilin Mudansa” ba publiku, tamba grupu Fretilin mudansa nudar grupu nebe mak halo parte iha IV Governu Konstitusional. Kestaun ne’e importante atu nune bele minimiza Konflitu de Interese wanhira komisariu ne’e halao nia knar. Tamba Luta Hamutuk hakarak hateten katak Karik laiha rejignasaun formal husi Sr. Aderito de Jesus husi nia pozisaun iha estrutura politika grupu Fretlin mudansa, Luta Hamutuk sei kestiona nia pozisaun nudar komisionariu nebe mak independente.


Luta Hamutuk, 22 de Fevereiro de 2010