TimorNewsNetwork

Leitura husi Deputadu Jose Manuel Fernandes

FRENTE REVOLUCIONÁRIA DO TIMOR-LESTE INDEPENDENTE

FRETILIN

BANCADA PARLAMENTAR

DEKLARASAUN POLITIKA

Díli, 1 Fevereiru 2010

Oras ne’e daudaun komesa mosu hikas fali expekulasaun iha Media,

Jornais balun iha Timor-Leste, wainhira Rai Los hetan Liberdade

Kondisional.

Hahalok hirak ne’e kontinua hakarak halo buat nebe bosok sai fali

tebes, ho lian Portugues dehan nune’e “ Fazer da mentira a verdade “. Oras ne’e sira tauk ona, tan ne’e, sira hakarak repete fali cenários bosok nian nebe sira halo iha Krise tinan 2006 liu ba.

Pergunta mak ne’e, se mak hari’i Grupo Sekreto ne’e? se mak fó naran

ba Grupo Sekreto ne’e? No se mak hili Rai Los ka Vicente da Conceição tur nu’udar Komandante ba Grupo Sekreto ne’e?

Mai ita hakiduk fali ba kotuk, iha loron Julgamento Kamarada Rogério

Lobato nian, hodi nune’e ita hotu bele hatene lolos Grupo Sekreto ne’e se nian! Atu nune’e ita lalika moris tan tuir rumoris no sai fali atan ba expekulasaun baratu hirak ne’e.

Iha pleno Tribunal durante Julgamento Kamarada Rogério Lobato nian,

tuir Rai Los iha tempo neba nu’udar sasin, Rai Los rasik deklara ba

Juiz nune’e: “Grupo Sekreto ne’e Rai Los rasik mak hari’i eh hamoris, no Rai Los ho nia membro sira hili malu, nune’e membro sira ne’e mak hili Rai Los nu’udar Komandante ba Grupo Sekreto ne’e”!

Ami sugere ba maluk sira atu husu ba Rai Los, Mateus Arakat iha nebe? Oinsa to’o oras ne’e Mateus Arakat nia oin ita la hetan? Tansa no tan se, halo Mateus Arakat halai tiha ba Kupang, hodi lakohi fila mai Timor-Leste atu ba hatan iha Tribunal mos? Ba buka fali serbisu iha Aqua Mor iha Kupang neba, husik tiha fatin hanesan Empresário iha Timor-Leste, sai fali staff ka manager ba Kompanhia Aqua Mor iha Kupang.

Oinsa to’o oras ne’e sei dehan no expekula nafatin katak Grupo

Sekreto ne’e FRETILIN nian?

Se nune’e dunik, nu’udar Komandante ba Grupo Sekreto FRETILIN nian,

tan sa Rai Los sai fali Direktor ba Kampanha Kandidato DR José Ramos

Horta no Direktor ba Kampanha Sr. Xanana Gusmão ho CNRT nian iha

Likisa durante kampanha Presidencial no Legislativas iha 2007?

Maluk sira hotu nanok tiha, maluk sira hotu halo an delek tiha, lakohi buka hatene tiha, buka deit inventa istória hodi denigre nafatin FRETILIN nia imagem. Ami husu ba maluk sira atu lalika hala’o nafatin politika invasor nian iha RDTL independente, tanba politika de perseguisaun no denigre imagem FRETILIN nian ne’e só bele halo iha tempo okupasaun nia laran, keta sai nafatin kaki tangan ba Bapak sira.

Buka mos atu hatene faktus seluk nebe imi rai hela iha Arquivo. Rai

Los simu kilat iha loron 10 fulan Maio 2006 no loron 19 fulan Maio

tinan ne’e dunik ( 2006 ), Rai Los iha tiha ona Komando Xanana Gusmão nian, ne’e cenário saida nian no se nian los? Loke uit-oan ita nia matan halo luan hodi hare no ikus liu bele hatene lolos faktus hirak ne’e hatudu saida, atu nune’e ita ida-idak bele hola koklusaun nebe los no iha logika kona ba Grupo Sekreto ne’e.

Pergunta mak ne’e, se Rai Los sai nu’udar Komandante ba Grupo Sekreto FRETILIN nian, oinsa Rai Los hamri’ik fali nu’udar Direktor Kampanha ba Kandidato DR. José Ramos Horta no Direktor Kampanha ba Sr. Xanana Gusmão ho CNRT iha eleisoins Presidenciais no Legislativas 2007? Ne’e só bele akontese iha Timor-Leste deit! Mai ita ida-idak buka resposta ba pergunta oan hirak iha leten ne’e.