TIMOR POST
19 January 2010
Xanana Tristi Deputadu Sai “Liman-Ain” Emprezariu
Dili-Premeiru Ministru Kay Rala Xanana Gusmao senti triste ho asaun reprezentante povu iha Uma Fukun Parlamentu Nasional nebe mak uza sira nia poder hodi obriga Ministru sira atu intrega projetu ba emprezariu ruma nebe sira prefere.
Xanana hatete katak, durante tinan 2 nia laran, ninia membru governu simu telephone barak husi deputadu sira atu intrega projetu ruma ba emprezariu nebe deputadu refere propoin.
“Ita bo’ot sira favor ida, veteranus ruma iha ne’e karik, labele uza membru Parlamentu (Nasional) hodi telephone ba Ministru sira.”
“Agora imi liga ho governu, lalika liga saluran-saluran. Ami (governu) sala, ami mak koruptu, (ami) diak, ema seluk mak (diak),” deklara PM Xanana iha inkontru ho emprezariu sira iha Delta Nova, horseik.
Nia dehan tan, iha tinan ida ne’e, tenki hadia mos kualidade realasaun entre seitor privadu ho governu atu nune’e bele lao diak liu tan.
Xanana hatete katak, ninia membru governu sei la simu telephone husi ema seluk nebe emprezariu ruma haruka.
“Ami iha governu sei la simu telephone husi ema seluk nebe ita bo’ot sira buka atu telephone,” deklara Xanana.
Maske fo kritika maka’as, maibe, Premeiru Ministru Kay Rala Xanana Gusmao deklara orguilu ho susesu emprezariu sira iha implementasaun Pakote Referendum iha tinan 2009.
Ho susesu refere, PM Xanana promete atu sei fahe tan pakote ho sistema nebe hanesan maibe ho modelu ketak. Nia dehan, iha tinan ida ne’e, projetu ho valor rihun 250 mai kraik sei la tuir prosesu tender, katak fahe deit.
“Ida ne’e hau rasik mak sei kaer nafatin ho AECCOP no Koordenador Distritu (pakote referendum) sira,” haktuir nia iha inkontru ho emprezariu sira iha Delta Nove, horseik.
PM Xanana hatete, iha tinan 2009 governu nebe nia lidera desidi atu fo pakote referendum hodi bele kapasita no hakbiit emprezariu lokal sira hodi iha kapasidade atu kompete ho emprezariu internasional sira.
Xanana kontinua ejiji ba emprezariu sira atu kontinua iha
responsabilidade ba konfiansa nebe governu fo ona. Nia dehan, governu hakarak atu koko imprezariu sira ninia kapasidade
no responsabilidade.
“Governu fo praju badak (iha projetu Pakote Referendum) atu hare kbiit, kapasidade no responsabilidade emprezariu sira,” haktuir PM Xanana.
Iha fatin hanesan, Koordenador Pakote Referendum husi kada Distritu, deklara katak, ninia parte senti kontenti ho pakote referendum nebe governu fo ba sira. Tuir Koordenador sira katak, problema bo’ot nebe ninia parte infrenta iha terenu mak asesu dalan ba fatin projetu no kondisaun klima nebe mak la permiti.
Sira kestiona mos ba prosesu pagamentu nebe atraza ituan iha
Ministeriu Financas. “Projetu balun atinji ona 100%, maibe ladauk iha pagamentu,” deklara sira. (gin)
No comments:
Post a Comment