FRETILIN
BANCADA PARLAMENTAR
PARLAMENTU NASIONAL

KOMUNIKADU BA IMPRENSA

Dili, 29 December 2009

Jovem ida Mate, Ida Kanek : FRETILIN Ezigi Investigasaun Seriu

Tuir informasaun neebe bancada parlamentar FRETILIN simu, ohin dader jovem ida mate tanba hetan tiru horikalan iha insidente violensia neebe mosu iha festa ida nia laran iha salaun Delta Nova, Delta Comoro, Dili. Jovem ida tan hetan tiru kanek no baixa hela iha Hospital Nasional Guido Valadares iha Dili. Iha tempo hanesan agentes PNTL tenke tu’un ba fatin neeba halo intervensaun atu hapara konflitu violente neebe mosu iha festa fatin.

Ohin dader mos familia no belun vitima nain rua sira nian apresenta iha Uma Fukun no halau audiensia ho Presidenti Parlamentu Nasional.

Xefe Bancada FRETILIN nian, Deputadu Aniceto Guterres deklara ba jornalistas iha Dili ohin katak bancada FRETILIN ezigi investigasaun seriu ba akontesimentu ohin dader neebe jovem ida hetan mate no ida kanek seriu.
“Akonetesimentu iha neebe jovem ida hetan tiru mate no ida seluk hetan tiru kanek todan, seidauk klaru kona ba se mak tiru ka se mak sala iha akontesimentu neeba. Maibe buat ida mak klaru tuir ami nia informasaun katak jovem nain rua neebe hetan tiru rasik la lori kilat ka kroat ruma. Tanba akontesimentu seidauk klaru, ita labele fo sala ba se se deit. Maibe bainhira asaun polisial resulta iha mate ka kanek husi tiru, nee situasaun seriu tebes. Entaun tenke loke urgentemente investigasaun seriu no klean ida atu halo klaru, atu buka se presiza ba justisa ka lae.”

“Bancada FRETILIN fo ami nia condolencias ba familia vitima matebian nian, no hamutuk ho ema barak reza katak vitima neebe hetan kanek sei rekupera lalais,” Guterres dehan.

Maibe nia no bancada FRETILIN tomak mos husu ba ema hotu atu hakmatek no husik lei no justisa lao tuir sira dalan, “Tanba ami nudar Povo nia representante sei tau matan katak investigasaun lao duni ho imparsialidade, seriedade no tuir lei. Ami husu ba ema hotu atu hakmatek. Husu atu labele halo julgamento ba se se deit, tanba ida nee papel autorididade investigativas no Ministerio Publiku nia knaar atu halau investigasaun no tuir mai tribunal mak bele halo julgamentu,” Guterres deklara.

Guterres dehan katak bancada FRETILIN nia deputados agora dadaun buka hela informasaun kona ba akontesimentu atu bele akompanha ho didiak, tuir deputadu nia knaar fiskalizador, katak prosesu investigasaun lao duni ho seriedade no urgensia.

“FRETILIN hanoin katak importante tebes atu halau investigasaun ida neebe bele hasai resultadu transparente, kredivel no tuir lei neebe bele satisfas ema hotu neebe afetadu, liliu vitima matebian, vitima kanek no sira nia familia. Ita hare ona to’o ohin loron katak investigasaun barak ba atuasaun polisial la lao to’o hotu, la iha kredibilidade, no la iha resultadu ba familia no vitima sira. Ami sei assegura katak ida nee la akontese iha kazu ida nee,” Guterres temik.

Guterres ezigi mos ba Provedor Direitus Humanus no Justisa atu akompanha investigasaun atu hare se iha indicios ruma kona ba violasaun direitus humanus.


No comments:

Post a Comment