TimorNewsNetwork

REPUBLICA DEMOCRATICA DE TIMOR LESTE

PARLAMENTO NACIONAL

Bancada Parlamentar FRETILIN

Nota Komonikadu ba Imprensa

Dili,17 Setembru 2009

Tuir Konstituisaun RDTL:

Parlamento Nacional Iha Direitu Defende Estadu de Direitu Demokratiku

Relasiona ho publiksaun noticia iha Jornal Nacional Diario loron
16/09/2009 ho titulu noticia PR Ramos Horta  : “ Parlamento Nacional
Laos fatin konfrontasaun “.

Ho deklarasaun Presidente  Republika ne’e, Bancada Parlamentar
Fretilin  iha uma  fukun Parlamento Nacional,hatoo nota komonikadu
katak, deklarasaun ne’e laloos tamba Parlamento Nacional la’os deit
nudar orgaun nebe iha knar fiskalizador, maibe Parlamento Nacional mos
fatin halo debate no fatin hamosu diferensia ideas, Parlamentu
Nacional  iha direitu hamosu nia pozisaun rasik, karik desijaun balu
hasai iha Estadu ne’e illegal no inkonstitusional.

Tamba Parlamentu Nasional nudar orgaun soberania ida nebe iha
kompetensia atu lakonkorda desizaun ruma, bainhira desizaun ne’e, la
tuir konstituisaun RDTL nebe konsagra tia ona iha nasaun ida ne’e.

Parlamentu Nacional hanesan fatin bersu moris demokrasia, fatin
hametin demokrasia, fatin halo debate no  fatin hamosu diferensia
ideas, maka Parlamento Nacional iha direitu atu hatoo nia preokupasaun
  ba desijaun saida deit, no kontra mos  desijaun saida deit,  bainhira
desijaun balu halao la tuir konstituisaun no lei  nebe iha.

Bainhira buat hotu halao tuir konstituisaun no lei, no regras sira
nebe iha, ne’e laos konfrontasaun. Konfrontasaun bainhira ema tuda
malu , ema sunu uma. Bainhira orgaun soberania ida hatudu nia aan,
hodi defende estadu de direitu demokratiku no separasaun de poderes,
ne’e la viola, la kontra konstituisaun no lei, ne’e laos
konfrontasaun.

Tuir artigu 70 konstituisaun RDTL hatete partidus politikus sira iha
direitu ba oposizaun demokratika, no mos direitu atu hetan informasaun
regular no diretamente kona ba lalaok asuntu interese nasional.

Ne’e duni deklarasaun Presidente  Republika nian nebe hateten katak
Parlamentu laos fatin konfrontasaun ne’e laloos, tamba  Parlamentu
Nacional mak fatin debate, fatin diferensia ideas, fatin direitu
oposizaun, ne’e maka demokrasia, ne’e laos konfrontasaun.

Informasun kompletu kontaktu : Deputadu Jose Teixeira, No HP : + 670 728 7080
Staf Media Officer, no. HP : + 670 7345 195.