JORNAL DIARIO NACIONAL

PM Xanana Gusmao: Australia Naok Mina Labele Hakilar Kurupsaun iha TL


Dili, 10 Agostu 2009

Timor Leste (TL) sei la rende hadau malu petroliu ho Australia, tamba ne’e, Australia labele hakilar korupsaun iha Governu Aliansa Maioria Parlamentar (AMP) lideradu Primeiru Ministru (PM) Kay Rala Xanana Gusmão.

“Australia, Jornalista nain nen mate iha ne’e hakarak bosok tan, tamba sa?, tamba hakarak naok ita nia petroliu, ida ne’e mak Jornalista Australia hare mos ida ne’e, labele mai kritika no hakilar hau nia Governu, hau Xanana, hau dehan ona, labele hanoin katak, hau tauk, Jenerais Indonesia sira, sira funu ho hau mak sira sai hotu Jenerais, ami iha difikuldade makas iha tinan 24 nia laran, hau la rende, ne’ebe ho hadau malu petroliu mai hakilar hau nia Governu, ne’e hau dehan lalika boy, la hetan boy,”koalia ho lia siak, Xefi Governu Xanana Gusmão, Sesta (7/8) foin lalais ne’e, iha Bairo Sentral, Dili, relasiona ho media Australia balun ne’ebe publika PM Xanana fo projektu ba nia oan feto, ba sosa fos ninian.

Sublinha PM Xanana, ida ne’e (Xanana-Red) funu iha ailaran, Jenerais Indonesia sira sae hotu ona Jenerais, nia (Xanana-Red) mak nafatin.

“Tamba ne’e, hau aviza ba Jornalista Australiano sira labele bok hau nia Governu, iha tinan 24 nia laran, sira asina naok petroliu iha Timor Leste nian, e agora mai mak koalia bar-barak, hakarak dehan ita ne’e sai nafatin ema ne’ebe la serve, lae, ho hau lahalimar, dala ruma ita hamnasa ba malu, maibe ho Xanana lalika halimar, buat sira ne’e ba hau, ami mak ukun liu tiha,”dehan Xefi Governu AMP ne’e.

Xanana Gusmão haklaken, parte hotu bele koalia, nia sei la liga, tamba ninia objektivu ne’e ba povu no rai ida ne’e nia diak no futuru.

Nune’e, mos PM Xanana deklara liu tan, parte opozisaun FRETILIN mos bele hakilar nia Governu, hodi husu PM Xanana hasai Ministra Justisa Lucia Lobato no Ministra Finansas Emilia Pires tamba servisu ladun los ka iha indikasaun korupsaun, ida ne’e nia (Xanana-Red) la hakfodak ho akuzasaun.

“Hau rasik mos iha akuzasaun, hau favorese ida ne’e no ida ne’eba, hau la hakfodak, sese deit mak ponta hau nia membru Governu, hau tenki defende, hau dehan bebeik ona, se iha ona kazu konkretu ida tau iha Tribunal, e Tribunal aviza hanesan ne’e mai hau, o nia membru Governu ida iha problema hanesan ne’e mai hatan iha Tribunal, hau ba kaer Ministerio ida ne’e, ita bot ba responde hau mak kaer Ministeriu ida ne’e, prova dehan nia sala, hau bolu fali ema seluk, se prova dehan nia los, nia mai fali, e hau fila fali, e ida ne’e mak responsabilidade obrigasaun Xefi de ekipa, se pose hau rona ne’e korupsaun hau hasae, e ida ne’eba korupsaun, mais korupsaun saida, se ba hau rasik mos hau ba,”koalia PM Xanana Gusmão. J-2

No comments:

Post a Comment