TimorNewsNetwork

PARLAMENTU NACIONAL

DEKLARASAUN POLITIKA

Loron Segunda 15 de Junho 2009

Husi Deputadu Elizario Ferreira

Deklarasaun politika iha loron ida ohin iha relasaun ho “Bolsu Estudu
no Tratamentu Visto ba Estudantes sira iha Indonesia“ husi Ministeriu
Edukkasaun.

Na’I Prezidente no Belun Deputadus sira:

Koalia konaba Tratamentu visto husi embaixada Timor-Leste iha
Indonesia ba estudantes ne’ebe estuda iha nasaun refere, asuntu ida
ne’ebe Parlamentu ne’e koalia kleur liu ona;

Ohin ami foti fali kestaun ne’e iha relasaun ho ami nia viagem ba
Indonesia halo tratamentu saude, maibe ami mos hasoru malu ho
estudantes sira husi, Surabaya, Malang, Yogja no Bali. Estudantes foti
kestaun hanesan durante ne’e sira hetan problema konaba tratamentu
vistu, liuliu  estudantes sira la iha osan atu ba trata sira nia visto
to Jakarta, tamba ne’e, oras daudaun iha Yogja polisia imigrasaun fo
ona atensaun ba estudantes nain 5 atu sira sai mai Timor-lesta mak
fila. Se mak polisia imigrasaun sei deporta estudantes nain lima ne’e
tamba ne’e sei difikulta sira nia estudu.

Lamentasaun ne’ebe foti maka laos sira lakohi atu trata visto maibe
distansia ba Jakarta dook liu no estudantes sira nia osan la
suficiente atu halo sira viagem ba to Jakarta.

Na’I Prezidente no Belun deputadu sira
Konaba bolsu estuda hetan lamentasaun husi estudantes sira katak bolsu
estudu ne’ebe Ministeriu Edukasaun fo ba estudantes sira
diskriminativu no nepotismu, nune’e mos sira ne’ebe programa mestradu
atu halo peskiza Ministeriu Edukasaun fo deit $ 300 (Dollar Amerikanu)
ne’e la to ba sira nia deslokasaun mai halo estagio iha Timor-Leste,
no iha populasaun baibain nia oan barak ne’ebe selu rasik sira nia
eskola to agora Ministeriu sei dauk fo atensaun ba sira. Estudantes
ne’ebe simu bolsu estudus sira ne’ebe nia maluk serbisu iha
Ministeriu.

Na’I Prezidente no Belun Deputadu sira;

Estudantes sira lamenta konaba asaun embaixada nian tarde atu atende
sira nia visto, Ministeriu nia distribuisaun bolsu estudu
diskriminativu, estudantes sira  mos fo hanoin katak se bele aumenta
tan adidu edukasaun ba embaixada Indonesia atu atende diak liu visto
estudantes sira iha Indonesia. No konaba distribuisaun bolsu estudu
sebele labele diskrimina no labele hili familia ka kolega deit nune’e
mos aumenta orsamentu peskiza nian ba estudantes sira ne’ebe programa
mestradu iha Indonezia.

Mak ne’e deit ami nia deklarasaun politika ba dader ida ne’e. ba Na’I
Prezidente no belun deputadu sira nia atensaun ami hato obrigadu wain.

ATU HETAN INFORMASAUN SELUK TAN DERE BA DEPUTADU ELIZARIO FERREIRA 723 7118