DECLARACAO POLITICA DA BANCADA FRETILIN
PLENARIO 29 DE SETEMBRO 2009
Sr. Presidente PN
Distintus deputadus
Povo Timor-Leste tomak,
Bankada FRETILIN koalia dala barak ona no sei koalia bebeik konaba saida maka ami hanaran “Eskandalu Bot” hosi Sr. Primeiro Ministro, tanba retira ka halo libertasaun illegal ba Maternus Bere, ne’ebe kumpri hela nia termu prizaun preventiva iha Prizaun Becora.
Maternus Bere, lider milisia Laksaur nian ida, ne’ebe indisiadu halo krime kontra Humanidade hanesan Co-autor ba masakre iha Igreja Suai tinan 1999. Hanesan mos lider no membro milisia balun ne’ebe hetan ona prosesu justisa iha Tribunal Crimes Graves iha Dili, Tribunal mos hasai tiha ona mandadu de Kaptura ba Maternus Bere, desde 2003. Tuir mandadu ida ne’e, maka nia hetan kapturasaun hosi polisia iha Suai, no ikus Juis tribunal Suai ordena prizaun preventiva ba nia hodi hein prosesu julgamentu.
Maibe, hanesan ita hotu hatene, tuir deklarasaun hosi propriu PM ba iha orgaun komunikasaun Sosial, katak iha dia 30 de Agostu 2009, Sr. Primeiro Ministro rasik hodi Governu de facto nia naran, halo desizaun haruka hasai Maternus Bere hosi prizaun Becora. Sr Presidente do Tribunal de Recurso no Presidente do Conselho Superior Magistratura Judicial rasik, iha nia Komunikadu, konfirma ba ema hotu katak laiha aktu judicial ruma hosi Tribunal kompetente atu hasai Maternus Bere.
Sr. Presidente
Distintus Deputadus,
Ita hotu konsiente, hanesan mos Bankada FRETILIN konsiente no hakarak tau interese nasional, iha interese grupu ka interese partidariu nia leten. Ema barak koalia interese nasional hanesan konseitu ida, ne’ebe dala ruma sira interpreta tuir idak-idak nia gostu, nune’e tau fali interese ema ida ka rua nian, ka grupu ka partidu ida nian, maka sai interese nasional.
Kaju Maternus Bere, kazu ida ne’ebe ligadu ho justisa konaba krimes hotu ne’ebe akontese iha passadu, hosi 1974 to’o 1999. Konstituisaun da Republika artigu 160 hatete ona, katak krime hotu ne’ebe konsideradu hanesan krime kontra Humanidade, genosidiu ka krimes funu nian, ne’ebe mosu iha periodu ida ne’e tenke tuir prosesamentu kriminal ba tribunal nasional ka Internasional.
Tanba ne’e maka, situasaun actual konaba halao prosesu justisa ka atu hasai Maternus Bere, tenke hare hosi kontestu ne’ebe luan liu hosi vontade politika estadu nia atu halo tuir konstituisaun ou amnestia ba hahalok krime hotu ne’ebe akontese iha periodu 1974 to 1999.
Sua Exelensia Sr. Presidente da Republika dala barak ona hola inisiativa halo reunian ho lideres partidus politikus no bankadas parlamentares koalia konaba projectu lei amnestia, atu taka problema 1974 to’o 1999. Tanba amnestia sai hanesan kompetensia exclusiva Parlamentu nasional nian, maka parlamentu nasional maka tenke hola inisiativa atu halo projetu lei, ka fo seguimentu ba iniasiativa PR nian.
Hanesan ami hatete ona dala barak, katak Bankada FRETILIN nunka kontra inisativa PR nian, nune’e tanba assuntu ne’e afeta ba interese estadu nian, Bankada FRETILIN pronto atu diskute hodi buka consensus nasional, kuandu maioria parlamentar hola inisiativa. Bankada FRETILIN mos dala barak ona egige PN ida ne’e atu diskute relatoriu no rekomendasoens CAVR no CVA nian nudar dokumentus base, maibe ida ne’e seidauk akontece tanba Bankadas Parlamentares AMP nian lakohi fo prioridade ba dokumentu hirak ne’e.
Governo ho nia Bankadas Parlamentares AMP lakohi uza nia maioria iha parlamentu atu hola iniasitiva aprezenta projectu de lei konaba amnestia. Ne’e hatudu katak AMP sira maka laiha vontade no seriedade atu trata asuntu interese Nasional nian. Ikus mai, wainhira mosu reasaun mak’as ba desizaun Governu ne’ebe kontra konstituisaun no viola lei penal tanba retira Maternus Bere sem aktu judicial, sira buka justifika hodi dehan ne’e desizaun politika ka desizaun estadu ba interese nasional. Ho justifikasaun ida ne’e, sira hakarak obriga ema hotu-hotu atu simu maske sala bot, halakon soberania, no hamoe estadu tomak.
Se ida ne’e maka desizaun estadu ba Interese Nasional, tanba sa maka tenke hasai subar deit no la tuir prosedimentu legal? Tanba sa maka PM maka hasai, hanesan nia rasik rekonhese, laos Presidente da Republika? Tanba sa maka tenke hasai kedas iha dia 30 de Agostu 2009, labele hein tan ona desizaun hosi tribunal? Entaun desizaun ne’e, ba interese nasional ka ba interese AMP nian? Povo hatene ona, katak ne’e interese AMP nian.
Sr. Ministru Negosius Estrangeiro, sei tenta defende nafatin katak Governu hasai Maternus Bere atu deporta ka halo extradisaun ba Indonesia. Karik hakarak soe “fehuk manas” ba Indonesia, maibe laiha akordu ruma ne’ebe halo antes hasai ema ne’e, no ate a data akordu seidauk iha konaba ida ne’e. Ita hatene ona, Indonesia sei la hatan atu halo akordu ba kaju ida ne’e.
Sr. Presidente,
Justisa ba krimes iha pasadu nian liu-liu krimes ne’ebe akontese durante periodu hosi 1974 to’o 1999, sai kestaun Nasional ida inportante, no ne’e merese duni hetan atensaun bot hosi ita hotu.
Maibe, kestaun ne’ebe ohin loron halo Bankada FRETILIN preokupa tetebes, maka kestaun libertasaun illegal Maternus Bere nian, aktu ida ne’ebe kontra kontstituisaun no lei penal ne’ebe vigora iha ita nia rai.
Se Indonesia halo presaun ba Timor-Leste, tanba sira tenke defende sira nia interese atu obriga ita haluha sira nia hahalok krime hotu-hotu ne’ebe pratika hosi generais Inonesia, milisia sira no seluk-seluk tan. Maibe, tanba sa maka Hasan Wirayuda rasik la mai hasai Maternus Bere? Ka tanba sa maka sira la haruka sira nia forsa militar mai loke odomatan prizaun Bekora nian hasai milisia ida ne’e?
Tanba sira hatene liu ita, katak Timor-Leste nudar estadu independente iha nia soberania, iha nia sistema rasik, iha nia lei rasik. Sira fo respeitu ba asuntu internu Timor-Leste nian, tanba tuir lei Internasional estadu sira labele halo interferensia ba malu.
Konstituisaun da Republika dehan katak RDTL nudar Estadu de Direito Democratico no soberano, iha sitema separasaun dos poderes ho interdependensia entre orgaun soberania idaidak. Tribunais maka administra justisa lori povu nia naran, maibe nia independenti rasik katak ema ida ka orgaun soberania seluk labele halo interferensia, nia so bele halo tuir deit saida maka lei ho konstituisaun haruka.
Konstitusaun da republica mos dehan tan, estadu Timor Leste subordina ba konstituisaun no lei hotu, Estadu no nia orgaun sira exerse soberania nebe iha tuir konstituisaun. Tanba ne’e, aktu ka hahalok estadu nian so vale wainhira halo tuir konstituisaun.
Ne maka estadu Republika Demokratika de Timor-Leste no nia sistema rasik, ne’ebe reperesenta hosi orgaun soberania 4 ho idak-idak nia kompetensia maibe iha interdependensia: Presidente da Republika bele fo indulto ka halo komutasaun de pena ba em ruma hafoin prosesu justisa, liu hosi Decreto Presidensial; Parlamentu Nasional nudar orgaun koletivu, maka bele fo amnestia ba ema ruma liu hosi resolusaun ka halo lei amnestia.
Se Indonesia mos hakruk ba ita nia soberania, respeita ita nia sistema, maibe sa ida maka akontese agora, ita rasik maka estraga fali ita nia soberania, harahun fali ita nia sitema no viola fali ita nia lei rasik, ho razaun ne’be irasional : Ne’e maka desizaun estadu ba interese Nasional !
Kala los duni ! Maibe se Presidente da Republika maka hola desizaun nudar chefe de estadu, nia kompetensia iha ne’ebe? Iha Dekretu Presidensial numeru hira? Se Governu maka hola desizaun, tuir konstitusaun iha kompetensia ka lae? Iha artigu hira?
Karik presiza resposta ba pergunta hirak ne’e, maibe laiha ona inportansia, tanba Sr. Primeiru Ministru rasik deklara tiha ona iha orgaun komunikasaun social katak nia maka ordena hasai Maternus bere hosi prizaun sem aktu judicial, no nia rasik pronto atu hola responsabilidade ba ida ne’e. Ida ne’e maka faktu inportante, no hatudu momos ona ba ema hotu katak aktu ne’ebe Sr Primeiru Ministru halo ne’e, Aktu illegal, viola konstituisaun, no liu-liu nia comete crime konfesadu kontra artigu 245 Codigu penal.
Sr. Presidente,
Ilustres deputadus,
Ita nia estadu hatu’ur iha konsttuisaun no leis, nune’e maka hanaran Estado de Direito Democratico. Ita hotu mai tur iha Parlamentu ida ne’e, tanba konstituisaun maka fo dalan no poder mai ita atu halo lei oioin, ne’ebe obriga sidadaun hotu-hotu tenke hakruk no kumpre ba. Nune’e mos Governu.
Oinsa, se ita rasik maka nega fali konstituisaun no viola lei, hanesan dadaun ne’e, Governu maka haneha fali Lei no haksoit sae hodi sama fali Konstituisaun. Ne’e maka halo ema hotu laran taridu, hanesan mos Bankada FRETILIN preokupa tebes: Estadu ne’e atu lori ba ne’ebe? Sidadaun hotu-hotu iha dever konstitusional, atu hatene no husu responsabilidade politika, moral no ate mesmu responsabilidade kriminal, ba hahalok Governu nian ida ne’e.
Iha kontestu ida ne’e, no hare mos ba direitu konstitusional nudar deputadus Parlamentu Nasional, ami Bankada FRETILIN hamutuk ho Bankada KOTA apresenta Mosao de Sensura ba Parlamentu Nasional, atu egige responsbilidade politika ba Governu AMP.
Governo nudar orgaun politiku ne’ebe lidera hosi Primeiro Ministro, tenke mai responde politikamente perante Parlamentu Nasional nudar orgaun representativu povo tomak nian, tuir Konstituisaun artigu 107.
Mosaun de Sensura sai nudar meius legal konstitusional ba ami atu husu responsabilidade ida ne’e ba Governu. Ne’e normal iha sistema demokratiku iha mundu tomak. Mosaun de Sensura ne’e, sai nudar meius ida atu restaura soberania estandu ida ne’e nian, atu dignifika estadu de direitu, atu hametian povo nia fiar ba lei no justisa iha Timor-Leste.
Maluk deputadus AMP nian lalika laran taridu tanba ida ne’e. Estabilidade AMP iha itabot sira nia liman. Bankada FRETILIN la halo mobilizasaun ema ruma atu halo manifestasaun ka halo violensia, la organiza petisionarius, tanba laiha ona, la fasilita tan Maj. Alfredo hodi halo ameasa ho kilat, tanba mate tiha ona, hanesan buat ne’ebe ita bot sira halo tiha ona hodi alegasoens falsas hatun Governu FRETILIN iha 2006.
Ita hatene malu, se maka hamosu instabilidade no se maka kontribui ba demokrasia no paz iha rai ida ne’e. Sr. ida naran Rui Lopes komesa loke ibun ona iha Tribunal hatete sai lia los.
Bankada FRETILIN hatene, katak Governo AMP sei la monu, tanba ita bot sira sei vota kontra Mosao de Sensura. Ne’e itabot sira nia Direitu. Maibe, wainhira itabot sira uza duni imi nia direitu, Bankada FRETILIN mos iha direitu atu hato’o ba povo Timor-Leste tomak, komunidade internasional no ba ema hotu, katak Ditadura AMP abut metin ona iha Timor-Leste no pior liu Rezime Soeharto nian, tanba sira lakohi ona hakruk ba konstituisaun ho Lei nebe vigora, tanba sira sobu tiha Estado de Direitu, tanba sira hakarak ukun ho forsa, ho ameasas, ho violensia, hanesan uluk sira halo tiha ona antes sira hadau ukun.
Maka ne’e deit, Obrigadu!
Aniceto Guterres
